Machâ K. Pari
Eima biepipa ‘chanôzy thapatlôsana’ tahpa biepipa hmâpata article ro awpata Mara Student Organisation, Branch Guwahati ta ei na vaw raopa kyh liata thapawh a vaw chhih kaw ta, anodeikua kho dâh hawhta ei reihpasia thai lei awpa vâ deikua cha pei ei tah kaw.Châhrasala ei phana rakha ta ei ropa he palôhrupa liata a reituhpa zydua ta nama vaw patua-palua via awpata ei cha haw hmeiseih ei.
Chanôzy thapatlôsa awpa nata deichhy awpa abyuhna kyh eima reipasia via thei n’awpa ta a kaw viapata India râhchhôh nata râh sosâhpa su thokhazy liata chanôzy duahmo tlâhpipa eima pahnona rakhata rei tua awpa a byuh.
Khizaw pôhpalôhpa liata chanôzy duahmo he hlano tawh chhaota chapawzy nata â vaw hlie kaw. Biehrai lia chhaota hmô pita, Zunah hry liata chhochhi cha chanô nata hawtipa cha maluh reina lia chhao tah ama pahlao beih leipa hawhta eima thei ty. Chahawhna hra chata hlano daihti lia chhao ta chanôzy duahmo he vaw chhie kaw ta, saw sa awpa nata ti chho beihchhozy , thophao tithai nata lyu raihria awpa hawh deita tah pachâpa châ ei ta, ochhôh, khitlâh nata râh ryureina kyh liata zy, nô kyh –hlakyh rei awpa liazy ta cha ama palôhrupa liata chanôzy cha ahlao awpata pachâna rai rai ta hnei v’ei.
Khizaw kawh viapa saipa ta, chiso phoso viapa nata âsosâh viapa hawhta eima pachâpazy hry lia chhao ta dâh nata phôh, bierei kathlâpa liata chanô nata chapaw a pathlua-paeihna yleipa hawhta a lâ hrasala, chhôhru lia deikua râhri khâ a y thlâh ha chypata â lâ.
Atlâhpi ta ama chi nata pho, ama khitlâh chyu liata râh nanopa nata chi nanopa chanôzy duahmo thokha duah sai tua sihla, Khizaw râh hmasiepa nata asosâh chaipa hawhta eima pachâpa USA nata Europe râh thokhapa lia chhaota kyh hluhpi liata chanô nata chapaw- thaina nata sona a lyu nairupa lia chhao ta chanô châ vâ hrahro ta khokhei lei viana duahmo liata ama duana kao nata ama tovyuh awpa ama to leipa a hlu kaw chy.
Eima râh –India râh lia chhao heta khahlâta cha chi nano nanopa hry liata chanôzy duahmo phaleipa rei awpa a y hôlô chy. Aviapa chai ta Hindu nah hry liata ‘Sati- he a ma vahpazy ama thi no ta ama ri rao no ta ama hroh thlah hapa ta ama phôh hrapa he châ ta. He he chanô riaphapa, vahpazy châta ngâchhihpa taozie hawhta a pachuna a ypa vâta, ama palôh liata cha pachuna cha khâchâ rie ha ta, nôhmeipa ta y ta, chyhsa mohnaopa nata chysia dâdei chhao ama khopa tao theileipata nohmei châna palâsana sari râpa atao ngâthlah hapa hlâ ta cha ama vahpa hnoh ta thi hr’awpa cha amâ tlyh via. Chahrasala British daihti no ta Lord William Bentick ta he hmophaleipa nata rarôh y kawpa he pahlei awpa ta hmah thata la ta, dah zy taihta taopa ta pakhâpa châta,chatana chô chhao ta khitlâh liata amâ pachuna kha a i ta, apahnie kawpa vâ ei ta, he hmo phaleipa ataopa thei’pa achâhta avaw y thlâh pyly ty. Hinduzy hry liata chanô he a ma ly vei kaw. Chanô tah saw a sa awpa no ta ama mokhâh chaipa nata vahneipa hawhta ama pachâpa cha chapaw saw he acha, chanô saw cha vaduapa hawhta ama pachâ. Achhâpa cha chanô saw ta â chakaihpa dyhchâ tita vahpa chhôhkhanah ta amâ hnawpa (dowry )vâta nô nata paw ama hryu-dâhnazie kha pahno thlâh ha ei ta,chavâta ama ly vei. Cha bailai ta, âvahpa chhao ta kyhpachana palôh ta lapinô vaw daodo awpa hlâta cha thyukhei awpa hnawpa hawhta a tao thei lei nahta apalôhtlâh leipata, ama likaw liata bâhta a ei-chhiana nata a ryhleina a vaw y nahta chhochhi cha ryhpaona daihti tluapata chhôhpadâhpa liata hraikhôpa ta meitipa bao ta, sasy ta â raosaopa hawhta palâsa ta, raosaopa tlâ ama châ ty. He vâna he ta Hindu Society liata cha chanô saw a pipa he chhôhkha nata khitlâh chhao ta ma ly vei kaw ty. He ta liata ei vaw zie khohpa cha keimo la chhao dyhcha nata thyukheipa eima pahmôna dah he Hindu nah eima lyu ha bâ,he hmo phalei kawpa he myla hano ta cha eima khitlâh liata rairuna miah tlôkhei awpa a châna zie pahnopata M.CH.P-nahta eima pakhâpa he eima pyh thai chyu awpa a pha kaw.
Chatawhta Hindu chanôzy moh ta ryu lâchhâh hmo (Property) zy hnei pasaipa chatyh leipa ta,a atahma deikua cha Hindu Women’s right of Property Act 1956 hmâpata ryutohpa zy, nata ama moh ta hmodâh hnei theina zy , nôhmei vahpa a hneileipa zy chhao hnei theipa ama vaw châ ha. Dowry vata a thipa cha kheihawhpa zy lia ta ma cha theipa a y thlah chy hra. Hindunah hry liata a hneina nata a chhaihna kyh liata dâh pha kawpa zy hnei ha ei ta, chanôzy chhao tahma la amâ boh kaw.
Mosolman zy, Manipur zy hry lia chhao ta chanô duahmo he pha vei kaw sai ta, amâ bo vei kaw sai, amâ vahpa ta khatinorai ta bie kaw khapa ta liata ama ma thei, Manipur chapaw ta ama khozie chanô lapi ta hnei thei thlâh ha ei ta, Mosolman nah chhao lapinô papalih taih hnei pasaipa ama cha. Arab râh Mosolman chanônah chhochhi cha ngiachhie ama chhi ngasa.Ama mohchhiena nata ama thiepâ ngâna chhâ cha ama nôpaw khopa hneileipa ei sala, ama khopa ama hnei khiala chhôhkha moh pachhiepa hawhta pachâpa ta ama chhôhkha liata chapaw ahyrai ta chanô kha a thie thei, chanô patu-pakhipa achâ khiala vadua atyhna chôta, chhôhkha nata khitlâh moh pachhietuhpata pachâ ei ta, thie awpa pyly a châ.
Khahlâta cha su to nata râh to lia ta, khihtlâh nata chi nata pho hry liata chanôzy duahmo chhie kaw sai ta, a tahma deikua ama rah hmahsiena nata asosâhna châta chanôzy duahmo taopathipa he a cha tahpa pahno ei ta, ama chanônahzy châta dâh nata phôpa liata ama boh thei n’awpa nata ama hmahsie n’awpa ta dâh pha kawpa zy tao ei ta, cheihchalo pata, ama tovyuh cha ahyhma ta chhu pathai leipa hawh ta pachâna hnei ei ta, ama za thai kaw hra. Chyhsa rôhnapa Swami Vivekananda ta a bie areipa ”There is no chance for the welfare of world unless the condition of women is improved. It is not possible for a bird to fly on one wing.’he ama palôhrupa liata amâ py ngâsâ.
Atahma tawhta cha râhto liata hmahsiena vâta khihtlâh liata chanô tlybaina chhao a lei lyma hra. Khizaw a sosâh lymâna hawhta chyhsa palôhrupa chhao asosâh via lyma hra ta, chanôzy tlybai pata ama y pa he khitlâh, chi nata pho, rah hmasiena pakhâtuhpa laichaipa a cha tahpa pahno ei ta, chavâta ama tovyuh ama to cheingei awpa khokheina nata kao nano nanopa liata châna nata biehneina amâ phuhpa hawhta saiheina nata deichhy khohna khâchâ ama hnei ha. Khizaw sawkha nata India sawkha chhao ta chanô nata hawtizy hmahpasiesa n’awpa ta pachhuahpanohna phapa tao ei ta, hmah lana chhao thata ama hnei lyma.
Chanôzy duahmo a naizie pachâ peimawh pata U.N.O chhao ta ko 1975 liata ‘Chanôzy Kô (International Year of Women ) châta phuah ta, Kô 1975-1985 , kô 10 chhôh chanôzy cheihchalona, thapiphiana kô ( UN world decade for Women-equality Development and Peace) ta aphuah hra .India râh lia chhao ta hmâpa(Observed) châ ta, a kô chareih march hâta hmiatuapa he Chanôzy hâta (Women’s week ) châta ama hmâ lyma . U.N.O. chhao ta tahma cha khizaw pôhpalôh pahlypata chanôzy kao nano nanopata ama pathlua-paeihna pahlei awpata hmah a la ngâhai.
India liata kô 1992 kha ta National Commission for Women cha New Delhi liata paduapa châ ta, State to lia chhao ta State Commission padua awpa tahpa a châpa hawhta, Mawrah lia chhao ta kô 1998 pa liata Mizoram State Commission for Women paduapa châ ta, he Commission heta hmah la awpa sia kawpa hnei ta, India dâh ta a pasaipa hawh ta chanôzy baotuhpa nata rairuna ama tlôkhei n’awpa nata hmah latuhpa py a vaw cha. He thota chanôzy thapatlô ta, sasyh angâna ama hnei thei n’awpata Central lia zy, State Level nata District level lia zy chhao ta Women Empowerment Committee zy padua ei ta, Kô 2001 liata Asia râh pôhpalôhpa chanôzy duahmo cheihchalona nata tha patlô kô (Year of Women Empowerment) ta a phua.
World Council of Churches he khizaw awnano laipa 300 hlei apazao-pakhypa châ ta, ama hmo chhuah chaipa chhao chanôzy chhua-ua n’awpa nata cheihchalo n’awpa lâpi he châ chai ta, chanô châta ama hmo pachhuah-panopa nata a chhuahpa cha he he a cha hra.
1. Chapaw zy ta chanô pananona nata mopanaina ama hneipa tawhta pachha papua.
2. Chanôzy pathlua-paeihna pahlei.
3. Chanôzy a dona (right ) pabosapa nata ama sona, thaina zydua awnanopa nata khizaw hmasiena châta hmâpa
4.Awnanopa nata khitlâh liata chanôzy hmâtlâh châ awpata deichhy.
Khizaw Awnanopa chhituhpazy chhao ta project nano nanopa pachhuah pano pata chanôzy hmahsie n’awpa lapi ama pathâpazi lyma. Chanôzy duahmo taopathipa he ama pachâ peimawh kaw bâ pata âlâ.
Râh hmasiena lia maih ta, chanôzy deichhy khona, biehneina patosa khona nata cheihchalo ta ama tlohna(qualified) liata cha ama tovyuh chhu leipa ta, khokheina pie lyma awpa he ama chhuah. Chavâta râh hluhpi liata cha râh chhihthana kyh lia rai, sawkha raihriana kyh lia rai chanônah ta su peimawhpa ama patu hôlô bâ.
National Policy-2001 pa cha chanôzy tovyuh pabosapa a cha thei n’awpa nata a hluh via ta tovyuh phapa ama to thei n’awpa ta dâh nata phôhpa lâ chhâta a hriatuhpazy ta dâh chi nano nanopa Customary Law zy, Tribal law nata Personal law ( Hindu,Mohamedan,Christian etc laws ) zy cha sai pathina hnei ei ta, cha dâh cha a daihti ta liata thatlô kawpa ta hmâpa a châ thei n’awpata hmahlana pachhuahpanona chhao hnei ei ta,cha liata
(1) Chanôzy pabohsana nata adona tovyuh a chhupa cha dâh hawhta ama chô liata ku pathla lyma awpata.
(2) Raihriana liata thata rai pahriasapa nata tah raruahna tawhta pabohna, raihria mâ chhao â khopa ta pie awpa, Equal Remuneration Act and Minimum Wages Act hmapata
(3) Central, State nata District level liata dâh mo pathi tita chanôzy vaina nata pabohsana dâh chhao a byuhna hawhta mo pathi lyma.
(4) Legal Rights zy, Human Rights zy nata chanôzy châta dâh peimawhpazy he a kaw viapata phuahluah ta,apahnosa lymapa.
Achô liata National Policy tawhna heta Khizaw râh nano nanopa nata India sawkha chhao ta chanôzy duahmo ky totie liata taopathi ama chhuahpa hawhta atahma cha dâh pha kawpazy pachhuah pano ei ta, chanôzy duahmo chhao âkaw chhua-ua ngâsâ ha ba.
Marapa chanôzy chhao kao totie liata deichhy awpa he eimâ ngiah ngasa. Chanôzy deichhypa ta tha eima patlô khiatala eima râh chhao thlai thlai ta hmah a kaw sie lyma aw. Eima deichhy nawpa kao cha he hawhta vaw palâsa tua sihla :-
1.Chhôhkha liata: Chhôhto liana heta chanô saw nata chapaw saw chô liata palôh eima phaona dâh he a dolei kaw, thokhapa chhôhkha âsosâh viapa liata cha, cha palôh cha phao hlei v’ei , chhôhkha hluhpi lia deikua chanô saw nata chapaw saw eima deichhyna nata mohôhna dâh he â hlie kaw.Atlâhpipa ta kyh thôhta vaw palâsa tua sihla-
(1) Ama tha nata zâh hmâna kyh liata: Chanô rai tao awpa he a hluh kaw. Chanô rai nata chapaw rai he khâ eima panano thlâh ha. Abeipata miah taonazie cha ku nata phei sano rairie, mokhao nata nahkhao a lyu chyu pata miah tao ta, chanô saw châta ochhôh rai, tichho beihchho, o pathaipa nata beiphia pasipa zydua ama rai hawhta pachâna khâchâ hnei pi ta, chapawzy ku pakopata, niena daihti liata a nie awpa ngâlâhta eima pachâna he thy sihla, a hriakhei chyu su u. Chanô chhao ta cha rai zydua cha chanô tao awpa hawhta pachâna –nôpaw hru no tawhta chi phaleipa ama tupa he a thari duata phia pathlah ei su u. Chanô chapaw ta abyuhna hawhta o chhôh liata rai eima hria khei chyupa he chhôhkha a ryhna nata a tivyna a châ hra.Cha palôh cha nô nata paw chhao ta eima sawnah eima pachu hluh awpa abyuh.
(2) A chuna kyh liata: Nô nata paw hluhpi cha châ a chuna kyh liata chanô saw zy cha mohropa eih a cha awpa liata a pahryu padâh thlâhthlipa hawhta pachâna hnei pita, chanô saw châ pachusa lyma awpa thachhiena nata maophaona a la lyma awpa hoh leina eima palôh liata khâchâ a lai . Cha hawhpa palôh eima vaw hnei khai ha nata cha, chhôhto liata chanôzy châ thaileipa nata nohkhih leipa vaw hluh ei ta,cha chata khitlah hro panai ta, chanôzy hmahsiena lapi a khawtuhpa châ hra ta, khitlâh nata chi nata pho taihta hmasie thaileina a tlôkhei.He palôh he eima thy awpa a peimawh ngasa.
(3) Ryuto kyh liata: Nô nata paw ta tiama kawpa ta chhôhkha a tivy n’awpa nata saw nata nawhchâtapalôhraoh kawpata ama hriapasana theilâpa, sôh nata thih, hmobaoh, ohmo lyuhmo rai chanô saw nata chapaw saw liata eima rairuah awpa a byuh. Chanôsaw, saw hra, chapawsaw, saw hra, kyh eima pachâ kawpa sai ama châ. Chanô saw cha ryu via a to rai rai lei awpa hawhta pachâna he eima thy awpa a byuh.Chhôhto ta chanô saw chhao ryuto awpa eima pie khiatala a hyhma ta ky via hlei vei ei, i.e ei sawchanô nata âvahpa châta ryu vaw rai hra nata ei sawchapaw pa chhao ta alapinô ryutopa kha a hlykhei thlâh ha pyly ta, chavâta mohropa saw châta ryu-via a pasaipa hawhta eima pachâna he thla sihla, pachâna thiehpa hnei chyu su u. Akhihtlâh, a chi nata pho ta chahawhpa taozie eima hnei khiatala chanô saw pathlua leipa ta,tlao eima cheihchalo, chapaw saw nata chanô saw pathlua-paeihna nôpaw palôh liata a y leizie sawnah palôh liata a tu hra. Cha cha ta chanô saw zy chhao ta ama palôh pachâna liata aso panai leina nata riahphana apie hra aw. He kyh liata nôpawnah ta Paragraph 3 (1) (h) Sixth Schedule tlyhchakapa ta Inheritance law apha kawpata miah taopa thei ei sala a pha k’aw.
2. Khitlâh liata: Khitlâh pha n’awpata pynano nanopa VC, JAC (Joint Action Committee) NGO-MTP, KTP, MSO, etc. etc. tahpa zy a duah ta, cha liata chanô cha treasurer post hleikhô patu bei v’ei , sôh âboh n’awpata avaotuhpa cha ngâchhihpa chyhsa, chanô eima tly ty, chahawh ta a cha khiatala post hropa lia chhao ta chanô cha ngâ a chhih ta,a rai lia chhao ta pahnai â ngiah via, cha daihti lia ta cha khitlâh pha n’awpata hriana kyh lia ta pyh thatlôpa nata hmasiepa a vaw padua thei aw. Mopakha thatlôna ta py he siekhei theipa châ tiarâh leipa ta hria paraona vata hmophapa a tao theipa eima cha.Charasala post hro lâ la chanôzy ta patu lei awpa pachâna hnei pata âtlyhtuhpa palôh lia chhaota chanô candidate tao pachhi hra awpata pachâna rai rai hnei vei ei. Chanô pha kaw pa nata ngâchhih kawpa chhao hmâtlâh leipa hawhta tlâ ama vaw tyu chakhy. Khapa vata maw? Tlohleina rai kao kha lia hmata y taraw vei y, chanô a châ vâ dei ngâlâh ta na tlâ a cha y. Eima tovyuh a châ thei thlâh ha awpa chanô châ vâ deita eima kyhna a hluh ngasa. A pei ngasa.
Kô 2010-12 term liata MTP Laty liata Ls. Thluakho kha MTP President châta a tly ei ta, Laty MTP nah ama palôh a kawh kawpa ta ei pahno, chanô deichhy khona ama hnei kaw, kha term liata riapha kawpata pari theipa a dyuhna liata hmah la ta, khitlâh pathaina nata hrozie ngiapa pachuna lia chhao ta hmah la ta, ama hlaotloh kaw tahpa eima pahno.
Chavata chanôzy deichhyna nata hmâtlâh châ awpata pachhuapanohna kyh liata khitlâh eima hra awpa a pha kaw. Palôh pathai leipa nata chhiepa phaopa hlâta mohropa châta byhna châ awpa nata deichhy khohna palôh eima hneipa he keimo châ chhaota byhna a châ via. Deichhy khona palôh he hnei chyu su vy tahpa eima hrua kho kaw.
.
3. Rah ryureina kyh liata: Ko zabi 20 chhana la tawhta cha Khizaw su nano nanopa liata râh ryureina kyh lia chhao rai châ sala,political parties chhihtuhpa châna kyh lia rai châ sala, railaipa nata sâh kawpa keypost apatupazy chanô vaw y hôlôh bâ ei ta, ama moh rei khai thei mapi, atlahpipata vaw rei tua sihla, British Prime minister vaw cha hapa Pihnô Margaret Thatcher zy, Pihnô Colda Meir (ex.PM Israel) zy, Pihnô Benezir Bhuto (ex.PM Pakistan zy, Myamar rah ryureina apha thei na’wpata thata ateituhpa Pihnô Aung San Sue Kye zy,India Prime Minister vaw cha hapa Pihnô Indira Gandhi zy he khizaw pahnopata chyhsa rôhnapazy ama cha.
India rah liana heta chanô mohphapa nata rôhna kawpa, India Prime Minister a vaw châ ha pa, khizaw chyhsa pahnopa tlai ta âlâpa nata sopa,khizaw chysa rôhnapa hry liata atlo phapa Pihnô Indira Ghandhi he chysa riaphapa nata ngâchhihpa, râh châta hmahsie näwpa nata pha náwpata riapha ngâsâpata bie pathluna(Bold decision) a tao ngâhpa,râh châta ahrona âhlâtuhpa he my thei beih ma pi. Amyunô, Pihnô Sonia Gandhi, India râh Congress leader a châ ngâhaipa, khizaw pahnopa ta alâluahpa zy,India President avaw châhapa Pihnô Prabha Patil zy, India liata State nano nanopa nata Central lia chhaota Minister a vaw châ hapa nata Chief Minister nata châna sâh kawpa apatuhpa ama hluh kaw. Chaleipa chhao ta Pihnô Jayalalitha AIDMK chhituhpa nata Tamil Nadu CM a châ ngâhaipa zy, Trinamool Congress chhituhpa Pihnô Mamata Banerji zy, atahma nota Lokh Sabha liata Speaker achâ ngâhaipa Meira Kumar nata Delhi liata Chief Minister, term thôh dua apazao ngâhaipa Sheila Dixit zy chhao ama State nata Central lia ta chanô sopa nata ryurei thaipa, â lâluahpa zy sai ama vaw cha.
British sawkha ta Mawrah cha Superintendent pavaosa ta, Kô 1952 liata Lushai Hills District tao ta, a mohôh, cha liata Pawi- Lakher Regional Council eima vaw hnei hra.Mizo District Council liata chanô pano (2) Pihnô Lalziki Sailo nata Pihnô Maria Hmingliani zy cha nominated member châta raopa cha ei ta, Ko 1972 pa liata Mawrah cha Union Territory liata khaipa a cha nota Lakher District Council eima hmô hra. Mawrah liata chanô papali (4) Pihnô Saptawni (Nominated) Pihnô Thanmawii (Elected) zy, Pihnô K. Thansiami (Elected nata nominated châ pakaohpa) nata Pihnô Rokungi (nominated) zy châ ei ta, ryureina liata âmâ hlao hra, Lakher District Council liata Pihnô HC.Ngôny (1973-78)a tlyh patlohpa cha Lakher District Council ryureina liata â hlao hra.Pihnô H.C.Ngôny he Saikao bei sawchanô châta,chanô MDC atly patloh tuachaipa a cha.A rôhna ngasa.
Mawrah cha ko 1987, February no 20-pa liata state pitlohpa ta sopa châ ta,cha liata Pihnô Hlimpuii he atly patlohpa châ ta, ano he chanô Minister taihta a kaw patu phapa a cha, atano taihta chanô Minister tuachaipa nata hnôhchaipa a châ chy.
Mara Autonomous District Council liata chanô nominated ta eima hneipazy châ Pihnô J.Maki (1995-2000) PIhnô Lalbiaktluangi (2000-2005) Dy. Chairman zy, Pihnô B.Ngôthlua (2005-2007), Pihno A.Dawzu (2007-2012) châ ei ta, atahma 10th term liata achâ ngâhaipazy cha Pihnô B.Ngôkei nata Pihnô H.Ngunkungi zy ama châ. Chanô elected deikua tahma term liata cha y v’ei.Ko 2007-2012 term liata a tlyh patlopa Pihnô N.Naphie (L) châ ta, Dy. Chairman nata Executive Member su lia taihta a kaw tyupa eima hnei chhôhpa a cha. Vadua chhih kaw pata kô 2012 liata EM a châ ngâhai no ta miah a pahâsai ha ta, pei eima tah hmeiseih.Marahpa chanô su sâhpa patupa eima hnei chhôhpa, eimâ palai khei kaw nota he hawhta miah â vaw pahâsai thlâh ha pa he Mara chanô zy châta vâduana rarôh-y kaw pa a châpa ta ei pahno, a chhôhkha sanawhzy hnohta Abeipata thlahlôhna he pie lyma mawh sy tahpa he eima khokheina a châ hra.Mara chanô a no su liata a kaw thla awpa he eima hnei thei khao solo tly ma.
Achô liata chanô palâsapazy he thokha cha ama rai ama patu hlâta cha reihka âsaomâ leipa nata reihluh leipa, hmâtlâh acha awpa ta â ngia leipazy chhao ama châ aw, châhrasala vaw deichhy ei ta, ama vaw pasua-palâ ha nahta cha chyhsa rôhnapa nata hmâtlâh châ kawpa, chyhsa phahnai kaw pa nata zachhih kawpazy tlâ ama vaw châ laih.
Ko 1992-paliata India rah ryureina liata dâh peimawh kawpa sano ama passed pa cha thotlâh ryureina phaviapa VC hawhpa (Panchayati Raj) nata khihpi chhôh a vaona phaviapa (Municipalities) zy a châ. Mawrâh liata cha VC zy ama ypa vâta Panchayti Raj he hmâ byuh leipa ta, Municipalities dâh deikua hmâ awpata Kô 2007 liata ‘The Mizoram Municipalities Act 2007’ tao ta, cha liata 33% seat reservation chanô châta â hlao leipa vâta ‘The Mizoram Municipalities (Amenment) Act 2009’ liata taopathi ei ta, cha liata pahlaopa châ ha ta, Aizawl Municipalities Council liata ward 19 pachhaipa liata ward 6 cha chanô seat a vaw châ haw.Alypa a cha ngasa.
Chahawhna chata MLA,MP lia chhao ta India râh ryureina o sanopa liata chanô châta 33% hlâta chy leipa bill amâ ngiakheipa cha Rajya Sabha chata paryhsa ha ta, ryureina o lai viapa Lokh Sabha deikua ta paryhsa thei mâh vei. Khati daihti ta ma cha a paryhsa pyly hr’aw nata eima hnabei a seih.Eima District Council ry, Village Council toh liata elected seat sâkha cha chanô châ ta pahawhpa(reserved)vaw châ ha ta, ly’pa a châ kaw. Mylâ hâno ta cha District Council liata MCHP ta chanô châta MDC seat reservation eimâ hawna hawhta hlao miah ama patloh thlyu nahta eima hnabei aseih hra. He châta chanôzy chhao kao totie liata eima chata-patiah ngâ k’awpa a byuh.
4. Awnanopa liata: Thatihpha ta chanô duasu thata panano ta, kao nano nanopa liata hmahsiena lâthlôh eima chhih ngâhai,aviapachai ta awnanopa chakaona liata thata eima sua ha ba, chahrasala eima dâhphina pai ma vei. Chanô machâ nata Pastor ordination deikua ru ama tah kaw chy.
Kô 2009 ECM Constitution seventh Revised Edition liata vahnei chhih kawpata chanô machâ châta tlyh pasai leipa cha thy ei ta, ordain pasaipa a vaw chapa cha eima ly kaw sai. He dâh liata chanôzy machâ tly pasaipa a vaw châpa tanah ta kô 16 Khichhôh Machâ ta ei chakao tawhta chanô Machâ tuachaipa châ awpata 5th December, 2010 Presbytary pakhypi, Tisôpi liata Rev.Dr.M.Zakonia ta ei na chahnao (ordained). Evangelical Church of Maraland history liata chanôzy châta hmo rôhna kawpa, a y beih leipa nata ngiatlâh châ kawpa â hlaopa a châ thlyu aw. Chanônah eima ly kaw. Nâ lykheipa ama hluh ngâsâ.KNP Hqrs. MCHP Hqrs. nata branches nano nanopa zy ta ‘Ryuchâ’ nata mo pakhata a lykheina Chabu pha ngasapa ryu atlohpa nata hmopiepa ei dao hluh kaw. Chaleipa chhao ta alykheina programme pha kawpa zy taopata daihtizy eima hmâh.
He heta chanôzy tovyuh phapa eima topa he eima ly thai ngâsâ tahpa a palâsa.Atahma no ta cha ECM chanô machâ chhao pathô eima vaw cha haw.Kô 2012 liata pano ama chahnao heih.
World Council of Churches (WCC) zy, World alliance of Reformed Churches (WARC) zy, Reformed Ecumenical Council (REC) zy, Lutheran Federation (LF) zy, Baptist World Alliance nata Methodist Council zy chhao ta chakaona liata chanô nata chapaw pathluana y leipata ama chakao kho thei n’awpata hmah ama la lymâ .Evangelical Church of Maraland lia deikua cha chanô Pastor châta pachhuah-panohna palôh liata â hla kaw chy pata â lâ. Thaina nata sona lâ chhao moh sihla ama nai patluana y hlei vei. Chahnao (Ordain) awpata a pakhâtuhpa cha ‘chanô’ ama châna vâ ngâlâh ta tlâ a cha.Krista liata cha chanô chapaw y vei, khizawpa liata hmahta châna su sâhpa nata biehneina chanôzy ta ama to ngâ nota awnanopa hmâchhâh ta chanô châna vâta chakaona eima pakhâpa he cha a pei ngasa. Awnanopa chakao awpata ahyhma ta a tlohpa y tla ma pi, chanô rai chapaw rai Krista va ngâlâh ta a tlohpa eima cha.
Khizaw awnanopa âsosâh chaipa U.S.A chhôh liata chanô pastor châta ama chahnaopa (Ordained ) pa duahmo tlâhpi ta vaw sai tua sihla-
1. United Methodist Church 8.31 %
2. United Church of Christ 13.63 %
3. Presbytarian Church 7.30 %
4. Lutheran Church 4.82 %
5. Episcopal 6.15 %
6. Southern Baptist 0.15 %
Awnanopa hropa duahmo:
1. Church of South India 20
2. Church of North India 6
3. Church of Scotland 26
4. Salvation Army ,India 2294
5. CBNEI 2
6. Mara Evangelical Church (Myanmar) 1.
He pahnona source he bâh ta a vaw paroh thei, chahrasal chhei tu hlei vei. Khizaw râh sosâhpa hawhta eima pachâpa chhao chanô ordained duahmo liata la pha tu hlei vei. Chahrasala tahma cha kyhto liata palôh ama hnei pathao kaw ba.
Eima pachâna do leipa he thla lyma sihla Abeipa hmâ thei awpata âpiepa chyhsa he cha deichhy lyma sihla cha chanôzy chakaona liata tha eimâ patlôna chhaichhi pha kawpa a cha aw. Chapawzy chhao ta chanô mohnao thlâh leipata kao nano nanopa ta deichhyna lapi eima tluapa lyma awpa a pha kaw aw. Chavâta chanô tha patlôna nata deichhyna kyh liata palôh a tao pathi sihla, hmohropa liata tlohleina y hlei leipata chanô châ vâ ngâlâh ta kyhto liata tovyuh phapa nata biehneina chhao patohsa kholeipata, khokheina rai eima pie thei leipa he rah hmasiena a pakhâtuhpa deina a châ tahpa pahno pathi heih su vy.
